Calanka.com -"Yaa Yiri Maya" ...U Adeegaha Shacabka

Kulan looga hadlayay sidii shaqooyin loogu abuuri lahaa Somalida Norway oo ka dhacay Oslo

Oslo, Norway (Calanka.com) 22-May-08

Kulan looga hadlayey sidii shaqo loogu abuuri lahaa Soomaalida shaqo la,aanta ku ah dalka Norwey(Arbeids-Ledig) ayaa lagu qabtay Xarunta Midab-kala-sooca ee (Anti Racist Center)oo ku yaal Magaalada Oslo ee caasimada dalka Norwey.

Kulankan ayaa waxaa soo qaban-qaabiyay,iskuna soo duba-riday,Dr Siyaad Maxamed Mursal oo ka mid ah Xildhibaanada Golaha deegaanka ee Gobolka Oslo iyo Dr Reknar oo la taliye u ah Urur loo abuuray inay caawiyaan Soomaalida shaqo la,aanta ah,qaasatan kuwooda muqayiliinta ah, ee uu dilooday Qaadka (Asxaabul-Marqaan),waxaana lagu casumay oo halkaas ka hadlay xubno ka tirsan Jaaliyada Soomaaliyeed ee dalka Norwey iyo marti-sharaf u dhalatay dalka Norwey.

Dhageyso wareysiyada:

Dr. Siyaad Maxamed Mursal
Dumarka Oslo
Imaam Qorey
Prof. RAKNAR
Mrs. Kari Elena

Dr. Siyaad Maxamed Mursal oo ka mid ah Xildhibaanada Golaha deegaanka Gobolka Oslo ahna qaban-qaabiyiha munaasabada oo furitaankii xaflada ka hadlay,ayaa kula taliyay Jaaliyada Soomaaliyeed ee dalka Norwey inay ka faaideystaan fursadaha shaqo ee wadankan laga helo,wuxuuna dardaaran u soo jeediyay Somalida muqayaliinta ah iyo kuwooda aan shaqeysan,inay la soo xiriiraan xafiiskooda oo loo furay inay caawiyaan Soomaalida shaqo la,aanta ah iyo kuwa dareema inay midab-takooor kala kulmaan goobaha shaqada,Xildhibaanka ayaa sheegay in saxaafadaha wadankan,ay ku been abuurteen Jaaliyada Soomaalida,isagoo arin lagu faano ku tilmaamay inay shaqo geeyeen intii ay abuureen ururkan loogu tala-galay inuu caawiyo Soomaalida shaqo la,aanta ah,in ka badan 30-ruux,kuwaasoo badankood ka shaqeeya waqti-xaadirkan Hoteelo iyo Dukaamo ku yaal dalkan.

Xildhibaanka kadib waxaa maykarafoonka lagu soo dhaweeyay Dr Reknar oo la lataliye u ah Ururkan loo abuuray inay caawiyaan Soomaalida baaga-muundada ah (Arbeids-Ledig),qaasatan ragga muqayaliinta ah,ayaa sheegay nasiib wanaag inay ku guuleysteen inay shaqo u abuuraan,Soomaali fara-badan,wuxuuna arin lagu farxo ku tilmaamay in Soomaalidu yihiin muruq-maal xoogooda maala hadii ay helaan dad ka caawiya habka shaqada looga helo wadankan.

Maykarafoonka ayaa sidoo kale lagu soo dhaweeyay Mrs Kari Elena oo madax ka ah Xafiiska midab-takoorka (Anti-Racist-Center)waxayna ka sheekeysay in xafiiskan loo furay inuu kaalmeeyo dadka la midab-takooro,iyadoo soo dhaweysay inay wada-shaqeyn la yeelato Jaaliyada Soomaaliyeed.

Haweeneydaan ayaa ku dhiiragelisay Soomaalida inay xafiiskeeda la soo xiriiraan hadii ay cunsuriyad iyo midab-takoor ka dareemaan goobaha shaqada.

Geba-gabadii kulanka waxaa munaasabada ka hadlay dhawr dumar Soomaaliyeed ah oo dhamaantood dhaliil u soo jeedihay ragga qayila ee mashaqeys-tayaalka ah,iyagoo sheegay in magacii iyo sharaftii karaamada Soomaalida ay hoos u dhigeen ragga shaqada ka dhigtay inay marqaamaan.

Dumarkaan ayaa Dawlada Norwey ka codsaday in lacagta ceyrta ah laga gooyo ragga Muqayaliinta ah,isla-markaana waxay wacad ku mareen inay boorsooyinka banaanka u dhigayaan (Bacdii-Madoobeed)ragga caadeystay inay shaqo ka dhigtaan qaadka,waxayna ku faaneen inay xariir u goglayaan ragga muruqooda maala ee xoogsatada ah.

Waxaa xusid mudan in Shabakada Calanka.Com oo lagu casumay kulankan,ay u suurto-gashay inay cod iyo maqal ka soo duubto munaasabadan,waxaana halkaan ka dhegeysan-kartaan dhamaan codadkii aan ka soo duubnay marti sharaftii ka hadashay kulankan oo aan halkan magacyadooda ku soo koobi-karin.

Xuseen Yaasiin Godo-Godo
TiiboTalyaani@live.com

Calanka.com Isha wararka xaqiiqda.