Calanka.com| Bogga Hore| :-"Yaa Yiri Maya" ...U Adeegaha Shacabka

Waayaha Cusub oo soo saaray heeso ka dhan ah al-Shabaab

Nairobi, Kenya (Calanka.com ) 17-Maarso-2010

Fanaaniinta da’da yar ee Waayaha Cusub saldhigooduna yahay magaalada Nairobi ee xarunta dalka Kenya ayaa geesinimo xoogani muujiyay, kadib markii ay soo saareen laba hees oo ay ku cabirayaan aragtidooda ku aadan kooxda Al-Shabaab.

Al-Shabaab ayaa ah awood xooggan oo ka jirta gudaha dalka Soomaaliya kuwaasoo magac diimeed huwan islamarkaana falal Argagax leh ka geysata dalka, iyagoo dila aqoonyahanada, shacabka iyo dhamaan waxgaradka Soomaaliyeed ee aan ku fikirka aheyn iyagoona sheegta in ay ku xiran tahay uru weynaha argagixisada aduunka ee Al-Qaacida.

HEESTA 1-aad

Abwaanka Waayaha Cusub ahna guddoomiyaha kooxdaasi Shiine Cabdilaahi “Shiine Akhyaar” oo labadaan hees alifay ayaa u kala bixiyay "Yaabka Al-Shabaab iyo No to Al-Shabaab".

Labadaan heesood oo Abwaan Shiine ku cabirayay falalka argagaxa leh ee falaago diimeedka Al-Shabaab ku kacaan ayaa waxaa aad u taageeray Shacabka Soomaaliyeed ee qaatiga ka taagan Al-Shabaab.

HEESTA 2-aad

Abwaanka ayaa sheegay in uu damiirkiisa ceshan waayay in uu ka aamuso arintan isla markaana qaati ka istaagay falalka argagaxiso ee Al-Shabaab geysanayaan taasina ku kaliftay inuu heesahaan alifo.

Abwaanka waxuu sheegay in labadaan heesood midkood ay la qaadayaan Fanaaniin dalka Kenya u dhalatay kuwaasoo iyagana ka danqaday dhibaatada falaago diimeedka Al-Shabaab ka geysanayaan gudaha Soomaaliya.

Horay ayaa waxaa heeso lagu cabirayo falalka guracan ee al-Shabaab u soo saareen fanaaniin magac ku leh bulshada Somaliyeed kuwaasoo ku dhaqan dalka Ingriiska.

Cabdilaahi Maxamed Cali
Nairobi, Kenya

Calanka.com: Isha wararka xaqiiqda